Grup muskuli abdominal ose “muskujt e barkut” ka interesin më të madh për tu zhvilluar nga gjithë komuniteti i fitnesit. Revista, publikime në mediat sociale, aplikacione, programe stërvitore e dieta ushqimore të cilat kanë në përmbajtje abdominalet janë më të preferuarat, më të ndjekurat dhe më të klikuarat në ditët e sotme dhe vazhdojnë me një tendencë në rritje.

Si pjesë e këtij trendi në këtë artikull do gjeni shkurt ndërtimin muskular, funksionin dhe ushtrimet përkatëse për zhvillimin e korsesë abdominale.

Abdomeni është pjesa muskulare e mesit të trupit tonë. Muri abdominal përbëhet nga: rektus abdomins, oblikët e brendshëm, oblikët e jashtëm dhe transversus abdominis. Funksioni kryesor që muskujt abdominalë kanë është: pengimi i përkuljes të shtyllës kurrizore mbi limit dhe asistues në stabilitet për të kryer funksionin normal. Muskujt lidhen në harmoni me njëri tjetrin për të realizuar lëvizjet dhe këta muskuj janë relativisht të gjatë duke përshkruar pjesën e mesit. 

Në pjesën e përparme dhe më të dukshmet janë të preferuarat, rektus abdomins ose ato që ne njohim si muskujt e barkut. Janë të pozicionuar në mënyrë vertikale në dy krahët njëri nën tjetrin. Ky grup muskul është shumë i gjatë dhe kontraktimi i plotë i gjithë fibrave muskulare është i pamundur. Ushtrimet duhet të ndahen në; ushtrime për pjesën e sipërme dhe ushtrime për pjesën e poshtme. Nqs realizoni ulje ngritje të shtrirë atëhere po kontraktoni pjesën e sipërme të grupmuskulit. Nqs realizoni ngritje të këmbëve atëhere po kontraktoni pjesën e poshtme. Këtu bëni kujdes: ngritjen e këmbëve duhet ta kryeni jo më lart se sa 90 gradë. Në pozicionin 30 – 45 gradë kontraktimi është maksimal.

Oblikët e brendshëm dhe të jashtëm: Këta muskuj zenë pjesën më të madhe të abdomenit. Janë ndihmës në frymëmarrje duke reaguar në oponencë me diafragmën. Gjithashtu këta muskuj janë kryesorë në veprimet rrotulluese që ne kryejmë dhe pozicionimet nga anës.

Transversus abdominis është pjesa e padukshme e muskujve abdominalë pasi ështe e vendosur nën shtresat muskulare të sipër përmendura. Pozicionimi në pjesën anësore krijon stabilitet në qëndrimin tonë duke zhvilluar kontraktim të vazhdueshëm. Transversus abdominis ndryshe quhet dhe korseja abdominale. Një nga ushtrimet specifike për zhvillimin e tij është “vakumi i stomakut”. Merrni frymë thellë, nxirreni ajrin plotësisht dhe qendroni për pak sekonda. Përsëritja e ushtrimit ndihmon zhvillimin e transversus abdominis dhe përmirëson frymëmarrjen.
Që të përfitoni sa më shumë prej ushtrimeve për zhvillimin e muskujve abdominalë performojini ato në top stabiliteti. Kjo do krijojë kontraktim më të madh dhe të detyruar të muskujve, njëkohësisht ju do të zhvilloni balancën.

Stërvitje të mbarë!